Bashkia Shkodër shpall ftesë të hapur për aktivitetin “TRIATHLON”
Përshkrimi i projektit:
Në kuadër të titullit ‘Shkodra, Qyteti Evropian i Sportit 2025’ dhe me qëllim promovimin e sporteve të qëndrueshmërisë dhe aktiviteteve në natyrë, Bashkia Shkodër synon të organizojë aktivitetin Triathlon 2025.
Triathloni do të përfshijë tre disiplina: not, çiklizëm dhe vrapim, duke përdorur terrenet natyrore të qytetit dhe zonave përreth (Liqeni i Shkodrës, rrugët panoramike dhe shëtitorja). Aktiviteti do të jetë i hapur për të gjitha moshat, gjinitë dhe nacionalitetet.
Gjyqtaria dhe rregullorja do të respektojnë standardet ndërkombëtare të triathlon-it dhe do të jenë të akredituara nga Federata Shqiptare e Triathlonit.
Qëllimi i projektit:
- Zhvillimi i triathlon-it si sport i ri në Shqipëri – Nxitja e një kulture sportive gjithëpërfshirëse që promovon shëndetin, disiplina dhe garën e ndershme.
- Angazhimi i komunitetit dhe sportistëve profesionistë – Organizimi i një eventi me karakter masiv dhe profesional.
- Promovimi turistik dhe ekonomik i Shkodrës – Krijimi i një atraksioni sportiv që sjell vizitorë dhe sportistë.
- Shfrytëzimi i burimeve natyrore – Përdorimi i infrastrukturës natyrore dhe urbane të Shkodrës.
Aplikimi:
Të drejtën për të aplikuar e kanë:
- Shoqatat sportive të regjistruara në regjistrin e OJF-ve që kanë në fushën e tyre të veprimtarisë sportin e triathlonit ose sporte të lidhura.
- Aplikimi duhet të dorëzohet në përputhje me formularin tip bashkëngjitur kësaj ftese.
- Subjekti aplikues nuk duhet të ketë detyrime të papaguara vendore apo të tjera të ngarkuara nga institucionet publike.
Nuk mund të aplikojnë:
Institucionet publike ose shtetërore që vetëfinancohen ose financohen nga buxheti i shtetit apo nga ente të tjera publike
Koha e zhvillimit dhe shpalljes së fituesit:
Shpallja e Ftesës së Hapur bëhet më datë 15/07/2025
Data e fundit e aplikimeve 29/07/2025
Këshilli Artistiko-Kulturor i Bashkisë Shkodër do të mblidhet me datën 31/07/2025
Shpallja e fituesit do të bëhet deri me datë 01/08/2025
Fituesi do të njoftohet publikisht nga Bashkia Shkodër.
Dorëzimi i dokumentacionit:
Aplikuesit duhet të dorëzojnë projektin dhe dokumentet e tjera të kërkuara tek Sekretari/Protokolli pranë Bashkisë Shkodër, sipas kritereve të përcaktuara në formularin tip bashkëngjitur kësaj ftesë, i cili duhet të plotësohet në mënyrë elektronike.
Fondi limit është 600.000 lekë
Kriteret e kërkuara:
- Eksperiencë në organizimin e aktiviteteve sportive (preferohet në triathlon ose disiplina përbërëse).
- Operatori/shoqata duhet të ketë në CV-në e tij arritje dhe suksese të vërtetueshme në aktivitete sportive të tilla ose të ngjashme;
- Vlerësohet cilësia e projektit.
- Shoqata nuk është degë/zyrë e organizatave dhe fondacioneve ndërkombëtare, dhe organizatat të tjera ndërkombëtare jo-fitimprurëse të regjistruara për të punuar në Shqipëri;
- Shoqata nuk është subjekt i ndonjë konflikti të interesit, sikurse parashikuar në dispozitat e Ligjit nr. 9367, datë 7.4.2005, i ndryshuar “Për parandalimin e konfliktit të interesave në ushtrimin e funksioneve publike”. Më konkretisht, përjashtohen nga vlerësimi ato projekte, në të cilat: Drejtori ekzekutiv, anëtarët e bordit apo personat e planifikuar për tu përfshirë në projekt janëtë punësuar në bashkinë apo institucionet e saj të vartësisë në të cilën aplikohet, në pozicionet: Zyrtari i nivelit të lartë dhe të mesëm drejtues sipas legjislacionit të shërbimit civil si dhe anëtari Këshillit Bashkiak, anëtar i kabinetit të Kryetarit të Bashkisë.
Kritere të tjera:
- Përgatitja e itinerarit të garës dhe organizimi teknik i ngjarjes.
- Aktiviteti duhet të ketë sistem elektronik për mbajtjen e kohës për secilën disiplinë