Çmimet Green Destinations dhe QualityCoast
Çmimet Green Destinations (GD Awards) dëshmojnë nivelin e përputhshmërisë së një destinacioni me Standardin Green Destinations, bazuar në një vlerësim të kryer nga auditorë të pavarur. Ky standard është i njohur nga Global Sustainable Tourism Council (GSTC). Auditimi zhvillohet çdo dy vjet dhe, në varësi të rezultateve të arritura, destinacionit i akordohet një nga nivelet e mëposhtme: Bronz, Argjend, Ar ose Platin.
Çmimet QualityCoast janë krijuar posaçërisht për destinacionet që promovojnë zhvillimin e qëndrueshëm të zonave bregdetare, duke i kushtuar vëmendje të veçantë cilësisë së vijës bregdetare, plazheve dhe mjedisit detar.
Destinacionet e certifikuara promovohen dhe nderohen çdo vit gjatë Konferencës Globale Green Destinations dhe në aktivitetin vjetor të organizuar në kuadër të ITB Berlin.
Pse të bëheni pjesë e Programit të Çmimeve?
Destinacionet që i bashkohen Programit të Çmimeve Green Destinations përfshihen në një cikël të menaxhimit të qëndrueshmërisë, i cili synon përmirësimin e vazhdueshëm të performancës përmes vlerësimeve periodike dhe verifikimeve të pavarura. Programi ndihmon destinacionet të planifikojnë, zbatojnë dhe monitorojnë politikat dhe veprimet e tyre në përputhje me standardet ndërkombëtare të turizmit të qëndrueshëm.
Metodologjia
Programi i Çmimeve bazohet në Standardin Green Destinations, një kuadër kriteresh për menaxhimin e qëndrueshëm të destinacioneve, i njohur nga Global Sustainable Tourism Council (GSTC) si përmbushës i kërkesave ndërkombëtare për turizmin e qëndrueshëm.
Progresi i destinacionit monitorohet përmes një sistemi treguesish të matshëm, duke e bërë procesin transparent, objektiv dhe të verifikueshëm. Udhëzimet dhe treguesit e standardit mund të integrohen lehtësisht në sistemet ekzistuese të menaxhimit të destinacionit.
Pjesëmarrja në Programin e Çmimeve përfshin një proces të strukturuar, i cili mbështet përmirësimin e vazhdueshëm përmes vlerësimeve periodike dhe auditimeve të pavarura.
Hapat e procesit
1. Shprehja e interesit
Procesi nis me paraqitjen e një kërkese përmes formularit online për të shprehur interesin për pjesëmarrje në Programin e Çmimeve. Në këtë fazë vlerësohet përshtatshmëria e destinacionit dhe ofrohen informacione të detajuara mbi procedurat, kërkesat dhe kostot përkatëse, në varësi të madhësisë dhe vendndodhjes së destinacionit.
2. Angazhimi dhe raportimi
Përfaqësuesit e destinacionit marrin pjesë në trajnimin hyrës mbi menaxhimin e destinacioneve të qëndrueshme dhe zbatimin e Standardit Green Destinations. Më pas, përmes platformës online të vlerësimit, raportojnë nivelin e përputhshmërisë me standardin, duke përfituar mbështetje teknike nga Sekretariati i Green Destinations ose nga përfaqësuesi lokal.
3. Vlerësimi
Raportimi i përputhshmërisë i nënshtrohet një kontrolli teknik dhe një auditimi të pavarur për të verifikuar përmbushjen e kritereve të standardit.
4. Certifikimi
Komiteti i Certifikimit shqyrton rezultatet e auditimit dhe, nëse plotësohen kriteret e kërkuara, akordon nivelin përkatës të certifikimit. Certifikimi është i vlefshëm për një periudhë dyvjeçare.
5. Planifikimi i përmirësimit të vazhdueshëm
Platforma online e vlerësimit ofron një mjet për hartimin e planeve të veprimit, si dhe shembuj të praktikave më të mira, duke mbështetur destinacionet në planifikimin dhe zbatimin e masave për përmirësimin e vazhdueshëm të performancës së tyre në fushën e qëndrueshmërisë, në përputhje me rekomandimet e auditimit të pavarur.
Standardi Green Destinations
Standardi Green Destinations përbën bazën e Programit të Çmimeve dhe është një grup kriteresh të njohura nga Global Sustainable Tourism Council (GSTC) për matjen, monitorimin dhe përmirësimin e politikave dhe praktikave të menaxhimit të qëndrueshmërisë në destinacione dhe rajone.
Ky standard e bën zhvillimin e qëndrueshëm të matshëm, objektiv dhe të verifikueshëm. Versioni i parë i Standardit Green Destinations, i hartuar në vitin 2016, u përditësua në vitin 2020 pas një procesi konsultimi me partnerët e Green Destinations dhe u harmonizua me GSTC Destination Criteria Version 2, duke ruajtur statusin “GSTC Recognised” edhe në vitin 2021.
https://www.greendestinations.org/awards-program
Shkodra, destinacion i gjelbër i certifikuar
Shkodra është vlerësuar me “Green Destinations Bronze Award”, një njohje e rëndësishme ndërkombëtare për angazhimin tonë në zhvillimin e një turizmi të qëndrueshëm, të përgjegjshëm dhe në harmoni me natyrën, kulturën dhe komunitetin.
“Green Destinations International” udhëheq rrjetin më të madh botëror të destinacioneve të angazhuara për qëndrueshmëri, ku janë përfshirë mbi 600 destinacione nga 60 vende të botës.
Nga Liqeni i Shkodrës në Alpe, nga Shiroka e Zogaj në Theth, nga qendra historike në Velipojë, Shkodra ofron një përvojë unike, ku ndërthuren natyra, trashëgimia dhe jeta lokale.
Ky certifikim e vendos Shkodrën edhe më fuqishëm në hartën ndërkombëtare të turizmit të qëndrueshëm, duke rritur besimin dhe interesin e vizitorëve nga e gjithë bota. Një arsye më shumë për ta vizituar, përjetuar dhe zbuluar Shkodrën!
