Klima

Klima e Shkodrës përcaktohet nga llojshmëria e relievit fushor, kodrinor, paramalor dhe malor,nga afërsia me Detin Adriatik si dhe nga liqeni i Shkodrës. Karakterizohet nga një klimë mesdhetare me dimër të butë e të lagësht dhe verë të nxehtë e të thatë. Në dimër fryn era e murlanit (erë lokale), e ftohtë, e fortë dhe e thatë, ndërsa në fund të vjeshtës fryn era e shirokut, që shoqërohet me reshje dhe fryrjen e lumenjve. Sasia e reshjeve në këtë qytet është e madhe. Mesatarisht bie 2500 mm shi në vit, pra një nga zonat më të lagështa të Shqipërisë. Muaji më i ftohtë i vitit është muaji janar, ndërsa muaji më i nxehtë i vitit është muaji korrik. Reshjet e dëborës bien rrallë, ndërsa ngricat shënohen zakonisht në fundin e vitit.